CERCLES D'AUJOURD'HUI
Dans cette nouvelle page, vous trouverez désormais chaque mois un résumé du Cercle du Moulin, quelques photos et extraits de lectures. C'est Nicolas qui fait "ch't'ouvrache là".
MERCI A LI!!
CERCLE DU 4 AVRIL 2023
Bonjour les amisses !
Ichi Nicolas pou l’Charque du Molin ed d’ Avri ! 26 personnes étotent persintes pou acouter ches poeinmes, canchons et autres carabistoulles !
In a comminché pa canter eune canchon ed Joelle JONAS, note persidinte, su l’air de ches Lacs du Connemara » de M. SARDOU. Cha sort d’où ? De s’tiète bin seur !
Pi in a lu ches 10 mots qui donnent du mau : Alain nos a dit :
« J’avos réussi à aarêter le rythme dare-dare d’une bombe ! » Bravo Alain BOND !
Martine a lu « Ch’l’horloger » aveuc tous ches mots sur l’thème du timps qui passe…
Jean-Marie BRAILLON nos a lu des haikus finement ciselés , des senryus ( haikus satiriques ), tout cha in juant aveuc les mots. Acoutez :
« Qu’mahous in mahons mahons is s’mahon-nte in grant mahon
n’ rapourte nhié mahon »
(que matous en coquelicots
se bagarrent engrand tumulte
n'est pas très important)
Et pis des poinmes de Georges FIDIT, ches Anagrammeana ! Des anagrammes in veus -tu in vla !
Jean Philippe a lu Martin du Tiss, mineur en 1900 d’Andé LEBON. Cha parlot d’un pourchau qui s’faisot écorché !
L’ 24 ed mai à 17h, à la Médiathèque de Valenciennes, les Tartes au Chuque vont juer du Jules Mousseron. Vnez acouter et vir ches onmes et ches finmes (voir la page "actualités des spectacles patoisants")
Gaston a lu un poeime ed l’Arnitoile, l’fameux jornal de Roger Bar. Ch’étot Milette de Maing qui l’avot écrit : « A l’aube de l’vieillesse, qu’in a pu toutes ses carechès, dussent qu’is sont ches tendrèches »
Michel Duwelz avot des poinmes ed Paul Mahieu Les finmes ed par chi
Pis i nos a fait eune lechon d’linguistique : l’ différinche inter i et j avant le XVII ème sièque. Minme in Picard : Porion/ porgeon. Ch’est le poireau qu’in minge et que ches chorchèles alles ont su leu guife !
Francis a canté « La java des piqués » de Joëlle JONAS
Nathan a canté : Si j’etos un carpentier de Johnny Hallyday !
Francine a lu aussi des poinmes : un recueil ed André Dahiez, La muse buissonnière,
Balade pour 4 médailles « Pour les frères de travail ad vitam eternit »
« Tous les revers ont leur médailles » alle a lu. Ch’est bin vrai !
René a dvisé d’l’ académie des Tiots Pères à Bugnicourt. Un texte sur l’ ducasse de Denain
"À l braderie " Ch’est l’ braderie et ch’ est le printemps !
Pi pou finir, avint d’boire un cop, Joëlle a canté L'bos , eune reprise de l'Estaca !
A vous vir in nompe l’prochain cop !
_______________________________________________________________________________
Cherque du 5 septempe 2023
Bonjour mes gins,
mardi, ch’étot l’rintrée au Cherque du Molin à Auno. L’z’écoyers étottent trinte dins l’clache ! Et pis i-avot des tiots nouviaux : les amisses Belges !
J’va ichi vos perzinter chu qu’i a été raconté conme poinmes, cacoules o bin nouvielles pou l’espéciale Belgique…
Pou commincher, Joelle a canté ène nouvielle canchon su l’air de L’eau Vive de Guy BEART. Conme ch’étot biau ! In a tertous canté et i-a pon quéu d’iau ni d’pleufe !
Alain a dit s’mot de perzintation. I-a perzinté Joelle, l’perzidinte, pis mi, l’vice-perzidint.
Adon, j’ai lu des définitions d’un dictionnaire Montois-Français de l’association des Montois Cayaux.
Quo qu’ch’est un Montois Cayau ? Lisez bin : ch’est un Montois qui est né de parints o grinds-parints Montois. Des rutes cayaux !
Georgette LALOUX, Montoise cayau, a lu un poinme su l’sinche du Grand Garde, dusse qu’i faut apochiner s’tiète pou porter chance o bin arvénir su l’plache un aute cop !
Pi aussi un poinme su les rétons ( les ratons chez nous-autes –) « Vive Mons pour ses rétons ! »
Hervé LOTT, un aute Belge de ch’borinache, près d’Mons a lu El fieu du cordonnier de Marcel GILLIS. « I n’faut jamée cracher in l’air » conme dit l’morale…
Michel DUWELZ a lu l’nom du Père de Georges FIDIT, auteur prolixe qui a écrit Valenciennes la vibrante, Visions du Terroir,Fleurs d’enfer o bin « Valinciennoiseries » Ch’est Michel qui-a arfait tous les lifes aveuc des nouvielles couvertures ! Un grind merci à li !
Jean-Marie BRAILLON nos a espliqué pourquo ( in Wallon in dirot pourquoé ) à Chauny dins l’Aisne in appelle ches habitants les « sinches ». Is voulottent un couple ed cygnes mais is ont écrit « cynge » !
Après i nos a perzinté l’Armonaque ed Mons, dusse qu’in treuve des textes in tout ginre conme cheule fap : El rate éyé l’moule
Gaston a lu un poinme ed « Ti et Mi » de Renée-Pierre LAMBERT : L’dispute aveuc m’finme et a écrit Les dangers de l’trottinette.
Max-André LEZY, not canteu, a canté ène canchon tirée d’ène pièche ed téyate ed Joelle JONAS : Un autre chemin. Un aute quémin pou ches honmes qui vont tout drot ichi dins l’mur !
René nos a lu un texte gramint sérieux sur Zeph Cafougnette à Ostende qui a quéu dins l’berdoule à l’basse campe ! Bon ouais, ch’est ène cacoule mais cha fait bin rire conme d’habitute ! Pis cor l’histoire drole su l’kangourou à Liège !
Jean-Philippe qui-est dallé en Ostrevent s’a mis à canter du Pierre HERNANDEZ : Born to be alive pou finir aveuc « Bol de soupe à l’ail » à Arleux !
Nathan a canté avint qu’tertous is s’ruent su l’confiture au safran du Mont Panisel a côté d’Mons. Trosieinme mi-temps oblige !
N’obliez pon l’manicrake pou d’ cacher sur Gogole « PicardRouchi.com ».
Ch’est fini pour septempe ! A bétot mes gins !
Cherque du 3 octope 2023
Bonjour mes gins,
Mardi 3 octope, ch’étot l’ Cherque du Molin à Auno.
L’ aprézeut i-est comminché mais i faisot rudemint bon incor ! I nd avottent qui étottent partis in vagances, pi d’autes mates o malates. Bon ouais, l’mawai Covid i-est là et i arcomminche a nous immarvoîer ! Que diape chti-lal !
J’va ichi vos perzinter chu qu’i a été raconté conme poin.mes, couyonnades o bin nouvielles.
Pou commincher, in a fait palé de ches spectaques du mos d’septempe par exampe chti des Rouchissants à Perziau et du canteu Cj’ti Aimé qui a canté et raconté des rudes cacoules !
Joelle canté su l’air de « L’eau Vive » de Guy Béart pis eune nouvielle, eune reprisse ed Trio EDF ( pas l’ectricité ! ). Ch’est « L’Tierre qu’ alle tourne ». Ch’est vrai, o l’vérite vraie conme disot Cricri, in a vraimint l’tournis quind in vot tout ce qui s’passe ichi, tous ches maux sur l’Tierre !
Alain a dit s’mot de perzintation. Eune cafougnette : « Histoire d’un terril ». I-est terripe Cafougnette !
Après, j’ai lu des couyonnades ( cacoules Montoises ) d’eune arvue Belche ed octope 1946 : « L’Ropieur », qui veut dire un garchon un molé solant.
Si té veux in lire eune, j’la mettrai su l’site. Cache après ! ?
Hervé LOTT, toudis l’amisse Belche, i-est arvénu pou un cop et i-a lu un texte Borain « L’miraculé ».
Joelle a lu un biau texte ed Philippe DUPUIS, « Cheul’lette », qui dvise del’fermeture d’Usinor à Dnain. I-a eu minme el prix in Picard pou l’nouvielle ! Complimints !
Alle a perzinté auchi l’darin life ed Guy DUBOIS, qui défind et qu’i-a défindu l’Picard. Ravise : « Les dits qu’i dit Guy ». In appelle cha un virelanque conme : « Un cacheu sachant cacher sins sin quien est un bon cacheu ! » Assayez d’ l’ardire vite !
L’texte lu ch’est « In cas inca », non putot « in cat in cas « , Bé non ! « In cat Inca ! »
Cha sint l’ca… ch’t’histoire ! Pus sérieuzmint, cha dvise d’un cat, d’eune catte, ed ches gins qui disent-nt aux polichiers avoir dins leu valisse « descatquizavottent » !
Si té veux l’lire o l’acater, faut d’aller invoier eune e-lette à Guy DUBOIS : cafou.gnette62000@gmail.com
René nos a lu un texte des « Amis du vieux Somain » , eune compilassion d’nouvielles in Patos comme « Les vieux d’achteure » ed Michel DECATTOIRE.
Et ches jonnes d’achteure? Bin is apprennent-nt l’Picard pou pouvoir lire chu qu’disent-nt ches viux !
J’in nd ai pourfité pou lire un poinme ed Georges FIDIT, nou patron, « L’Buveu d’bière », dins s’recueul « Valenciennoiseries », qu’Michel DUWELZ, parti à Torné, m’a donné. Merchi incor à li ! Ch’poinme j’l’ai lu auchi a des amisses au restaurant « Le Pot Flamand » dusse qu’is font eune carbonate ed campion !
N’obliez pas d’aller vir su l’arnitoile, cacher sur Google « PicardRouchi.com ». In a rajouté des poinmes pou l’z’infants, des textes, des vidéos…
Ch’est fini pour achteure ! A bétot mes gins !
Cherque du 9 Novempe 2023
Bonjour tertous ! Vlà chi le compte-rindu du cherque d’hier mardi 9 novempe !
In a comminché pa canter « J’voudros d’aller… » au Cherque du Moulin bin seur ! Cheule canchon ed Joelle, note perzidinte, alle est vraimint intrainante ! Alle nous invite minme jusqu’à Waverchain-sous-D’nain pou écouter s’troupe ed théâte : « Les Tartes au Chuque » qui vont juer des sketchs el samedi 18 Novimbe à 19h30 pour eusses avoir des doupes à donner au Téléthon ! Ch’est-ti pas eune ouvrache ed bienfaisance conme in dit ? Et pis Nathan, l’canteu, i cantera aussi inter les saynètes!
In est dallé mi et pis Joelle ( ben ouais in Rouchi l’possessif mi i-est pas dvant ! ) vir nos deux perzidints d’honneur, André PEULMEULE et pis Roger BAR, l’un à s’mason, l’aute à l’maison dusse qu’in s’intrain.ne pou l’arpos éternel conme dit René Maginelle…. Vous avez trouvé ? Ch’est l’maison d’artraite !
Ch’est achteure l’momint d’edviser des 10 mots en Français. Cheule année chi, che sont des mots du sport les vlà in Rouchi d’ichi ! :
campion / daller aux oranches ( et pas au Carnéval ed Binche Hervé ! ? ) / faux comminchemint / écappée / hors-ju … Bin i faudra attinte l’prochain cop o bin vnir au cherque, o bon raviser su l’carculoire ( nouviau mot pou ordinateur d’après l’commission des néologismes in Picard ).
Francine a démarré dins les « starting-blocks » aveuc sin preum texte el pus court possipe ! Pi alle a parlé d’ es taionne. Bin émouvint…
Bravo à li !
J’ai lu des poin.mes su l’co d’Aubry d’Edmond DEVEMY, in poète ed Aubry-Du-Hainaut. I-étot seurnommé : L’Zeph d’Aubry. Ch’est li qui a mis in pintur' el co du clocher in bleu, blanc, rouche ! Un sacré toupet mais cha li-a fait s’réputation !
Alain MARCHAL a lu eune histoire ed Michel FOUCART « L’pompier ». Michel ch’étot un amisse ed Edmond !
Joelle a écrit un poinme esprès pour l’Messe in Rouchi qu’alle va s’dérouler el diminche 11 déchimpe à Marly, à l’églisse ed la Briquette :« Les tambours ed guerre ». Cha bonque dins nos cœurs !
René MAGINELLE a lu in texte ed Guy DUBOIS : « Busiache edvant l’crèche » qui s’ra lu aussi pindant l’messe.
Hervé LOTT, not amisse Belche, a déclamé eune fape ed La Fontaine in Patois Borain : "L'ernâ eiet l'carbau"
Michel DUWELZ a lu conme d’habitute in pinme ed Georges FIDIT, not patron : « L’indication ».
Benjamin LEDUC nous a régalé aveuc ches cacoules, cafougnettes ed Jules MOUSSERON, o carabistoulles, mot écrit à l’Cité de l’Lanqu' Française ( aveuc wassingue ). Hureusemint qu’is n’ont mie mis « biloute ». In s’rot cor dins l’berdoulle…
Sylviane nous a lu eune lett' d’eun' fil' à s’mère. Cheul' fil'-lal alle est partie assez lon, aveuc sin Jules apparammint, et pis in fait ch’est pas vrai. Pourquo ? V’nez li dmander ( à Sylviane pas l’file ! ).
Ch’est toute. A s’arvir el 10 novempe au soir aux Tros Brasseus à l’Tiote Forêt, ( 3 Brasseurs, Petite-Forêt) pou nous acouter pindant qu’in minge eune bonne carbonate !
Cherque du 5 Déchimpe 2023
Bonjour tis-autes ! In s'a rasan.né pou l'assan.née de l'association Georges FIDIT.
Vos allez trover l'conter-rindu d ' el, perzidinte, du viche-perzidint itou !
Compte-rendu du Cercle du Moulin du 5 décembre 2023
Lieu : Médiathèque François RABELAIS d’Aulnoy-lez-Valenciennes.
Présents : 28 personnes
Nombre d’adhérents au 5/12/23 avant renouvellement : 26
Rappel : l’adhésion n’est pas obligatoire pour participer à cette réunion mensuelle.
Présidente : J.JONAS, Vice-Président : N.MINAIR, Trésorière : Any BROWERS
Excusés :
- O.ENGELAERE, directeur de l’Agence Régionale de la Langue Picarde
- M.P LELONG
- R.MAGINELLE
C.ANASSE, adjointe à la culture d’Aulnoy-lez-Valenciennes
L.MOREL, adjointe à la culture de Marly
M. DUWELZ
Ordre du jour
1) Chant de bienvenue
2) Remarques diverses
3) Rapport d’activités moral de la présidente
4) Rapport d'activités moral du vice-président
5) Rapport financier de la trésorière
6) Questions diverses
7) Remerciements
8) Projets futurs.
9) L’association Georges FIDIT achteure.
10) Pot de clôture
1) Chant de bienvenue
L’assemblée a débuté par une chanson de Joëlle JONAS sur l'air de L'eau vive de Guy BEART
2) Remarques diverses
Roger BAR, ancien président de l'association actuellement résidant à l’EHPAD les Magnolias à Marly ainsi que son épouse nous souhaite leur bonjour amical ainsi que l'auteur Jean-Claude LAMPIN.
Concernant les participants sur l’années écoulée, on note des provenances de tout horizon de la région : Valenciennois, Denaisis, Douaisis, Thiérache, Roubaisis et Wallonie en Belgique ! ) Notons pour cette soirée l'arrivée d'un nouveau de Nivelles. A noter qu'il n'y a aucun Aulnésiens adhérents à ce jour.
3) Rapport d’activités moral de la présidente
Voir rapport approuvé à l’unanimité ( 28 personnes )
4) Rapport d'activités moral du vice-président
Voir rapport en pièce jointe approuvé à l’unanimité.
5) Rapport financier de la trésorière
In a des doupes ! 2491 euros de recettes et 1987 de dépenses
Grache à l’subvintion d’el ville, aux pestaques de l’troupe Les Tartes au Chuque, aux adhérints… Merci à euss !
Rapport approuvé par 27 personnes ( 1 abstention car non-adhérent )
6) Benjamin LEDUC, secrétaire de l'association Insanne qui fédère des associations picardes nous invite au mois de février prochain à Lys-Les-Lannoy pour un week-end autour de la langue. Il est important de rappeler que la langue est vivante et qu'elle brasse toute la région linguistique.
Jean-Marie BRAILLON nous invite à consulte sa page URCHON PICO où plus de 446000 références en Picard sont disponibles.
Olivier Engelaere, de l'Agence Régional de la langue Picarde, excusé, fait part du souhait de ses membres de motiver la ville d’Aulnoy-lez-Valenciennes afin d'offrir au public notamment scolaire des activités, événements culturels ou bain de langage. En effet depuis 2022 le professeur Nicolas MINAIR enseigne le Picard, plus précisément le Rouchi ( Picard du bassin Valenciennois ) dans les écoles Émile ZOLA et Jules FERRY et ce, dans toutes les classes.
Rappel : la loi du 26 mai 2021 relative à la protection des langues patrimoniales et à leur promotion stipule que la langue Picarde peut être enseignée au sein des écoles.
7) Remerciements
Nous remercions la municipalité pour le prêt constant de la salle de la Médiathèque François RABELAIS d’Aulnoy-lez-Valenciennes.
Nous remercions également les participants pour leur fidélité, bonne humeur, leurs écrits partagés ou le fait de lire des textes d’anciens auteurs. Il est en effet important de mettre en lumière aussi les documents du passés tout comme promouvoir les écrits du présent.
8) Projets futurs.
Ils sont notés dans le rapport moral de la présidente. On peut mettre en valeur que le souci de la préservation de la langue va se concrétiser toujours auprès d'un public large ( enfants, scolaires, jusqu'aux personnes âgées) En effet il faut actualiser le Rouchi pour le faire connaître, le faire aimer et le transmettre !
9) L’association Georges FIDIT
Il est important de signaler que l'association rayonne au niveau culturel aussi bien dans un bassin géographique qu'au niveau des contacts et partenaires. Le site Picardrouchi.com traduit cette volonté de partager les objectifs de l'association : les comptes-rendus, les assemblées, les réunions mensuelles, les écrits des participants, l'actualité picarde dans la région… D’aller vir !
10) Pot de clôture
Il est offert par l'association pour héfinir sur une note joyeuse cette assemblée.
Cherque du 9 jinvier 2024
Bonjour mes gins,
ène bonne et heureusse comme i disot Roger BAR dins in d’ches poin.mes su l’Arnitoile ( l’anciein.ne arvue pas su l’ordinateu ! )
Adon, ej vas vous dire comme li :
« Ej vous la souhaite in vous imbrassant ed tout min cœur
Avec tous ches mots pleins d’doucheur et d’ichi
Tous ches mots qui font vif’ not’ Rouchi ! »
Mardi 9 jinvier, ch’étot no rindez-vous au Cherque du Molin à Auno. J’va ichi vo perzinter chu qu’i a été dit pa nos amis d’Auno, d’Thiérache, d’ Valinciennes, d’ Dnain o bin cor Anzin.
Pou commincher, Alain a lu ches vœux ed bonne année, bonne santé.
In a eu ène nouvielle canchon ed Joelle JONAS no perzidinte qui a canté su l’air ed « Santiano ». D’allez vir el canchon su l’site, cha vaut l’détour !
A m’mote qui faudrot faire ène chorale espéciale cherque du Molin o bin d’l’achuchon Georges FIDIT... ? Tertous i canté bin !
Francine a comminché pa nous perzinté in fascicule su l’Ducasse d’Auno qu’alle a écrit li-min.me !
Ene bielle ouvrache vraimint ! Cha pale des personaches d’el canchon et pi d’Auno.
Mi j’ai dvisé ed’m'n' interview à l’radio CNO, radio du Hainaut, à Valinciennes. Ch’étot pou mette in leumière no lanque et seurtout no achuchon ed patos Georges FIDIT.
J’ai li aussi in poin.me ecrit espécialmint pou l’messe in Rouchi qu’alle s’a déroulée in déchimpe à l’églisse d’el Briquette à Marly. I-avot in monne !
Pi in texte « Em punition » qui viend de ch’life : Proverbes, contes, poèmes en patois du Cambraisis
Mathieu, in tiot ed onsse ans i-est arvénu dans l’cherque avec es père. L’infant a persinté in Français in dialoque fin dreule. Es père i-a palé du lundi perdu.
« Ch’est l’ducasse, ch’est l’fricasse ! »
Rene MAGINELLE i nous a fait edviné l’écriveu du poin.me « Le matin des étrennes ». Tiesse qui l’écrit ? Répondez nous in invoiant in commintaire su no site !
PS : Tiesse est un mot pour traduire « Qui est ce » Tiesse / Qui qu’ch’est ?
Jean-Marie BRAILLON a li les vœux ed sin comarate Jean-Claude LAMPIN pi ène fap : « L’boquet et l’wipillon ». Quo qu’ch’est in boquet ? Jean DAUBY i nous dit dins s’ Dictionnaire Rouchi-Français qu’ch’est un écureuil. Et in wipillon ? Dallez li dmander su s’jornal Urchon Picot.
Quèques personnes ont li leu textes d’ches 10 mots in patos. J’in ai arçu quèques ins qu’in vot in photo ichi après cha.
Michel Duwelz a persinté l’lundi perdu o lundi parjuré, tradichon ed Tornai. Ch’est in arpas dusse qu’in met in ro à l’honneur. Et pis in bot, in minge de l’fricassée d’lapin. Miam !
Jean-Philippe i-a lu in poin.me ed Jules MOUSSERON : L’mariache à chabots, rapport à in mariache dusse qu’in i va pas à pieds décaux mais avec des chabots ! Awi, pou ç’n’année-chi à Auno in va armette ç’mariache-lal à l’honneur !
Quand j'écris " rapport à" ch'est ène tonure grammaticale du Rouchi, j'l'ai quer pace qué not amisse Gisèle Raverdy, qu'i-a écrit " Des gins d'Auno et d'ailleurs", in formidape recuel ed nouvielles et d'saynètes dins no lanque, alle a défuncté in déchimpe. Ej mé ramintuve de ches écrits, alle l'zes déclamot avec in fin bon accint ! Complimints à ti, Gisèle, et pi, té n'es mie oblié d'ches jonnes rapport à ta titiote fille, Prune, qu'alle a ramné t'life in clache pour présinter à ch'maristresse et pis à écoyers ! ( Photo à vnir )
Ichi ène photo prisse de l'liméro du mos d'jinvier d' Urchon Picot, qu'alle vient de s' n'ouvrache chitée pa d'zeur.
Ch’est fini pour achteure. A bétot mes gins !
Cherque du Molin : 6 févérier 2024
Mardi 6 févérier, quèques jours après l’candélée duss qu’in minge des ratons pou pas picher tout cron conme dit l’adache, ch’étot no rindez-vous du Cherque du Molin à Auno. J’va ichi vo perzinter chu qu’i a été dit pa nos amisses ed France o bin d’Belgique.
Pou commincher, in a palé d’ André PEULMEULE, nou incien perzidint qu’i-a créé l’cherque avec Roger BAR.
In a li des textes ed li et pi des hommaches comme in poin.me ed Joelle JONAS, o bin m’témoniache.
A lire ichi et dins « l’z’ouvraches d’écritures 2 » su l’site PICARDROUCHI.ORG. Dallez vir !
Sylviane a li in texte qu’i-étot dins ène brochure du temps duss qu’in compilot les récritures ed tertous.
Mi j’ai li in documint d’André su Valinciennes au 18ème chièque.
Joelle JONAS, no perzidinte, alle a canté su l’air ed « Santiano ». Nous-autes aussi !
Pou les 10 mots, Alain a li les siens.
10 nouviaux mots ont té donné pou l’mos de March :
cotron / broques / aufier / abrandoule / minteux / ouvrer / ramonchelache / wassingue / miyard / louchet
Francis i-a li « une soupe aux herbes » in rouchi, ène soup’ as hierpes, récrit pa ène maristresse qu’alle vivot dins les Alpes.
Mi j’ai dvisé d’Gisèle RAVERDY, in biau raion du Cherque, alle récrivot et alle déclamot ches textes dins un Rouchi d’ el rife drote d’Auno ! Sin life : Des gins d’Auno et d’ailleurs. C’texte li : Premièr’ et dernièr’ rincontre inter…ène auflette ( rapport à jinvier ) et in raton ( rapport à l’Candélée ! )
Mathieu i-est vnu avec sin père. I nous a conté ène farce d’un Chino dins in restaurant. In a bien rigolé ! Sin père, Pierre-Bernard, a récrit « Pouet-Pouet » ène référinche à Bourvil.
« J’li faisot pouet-pouet, alle m’faisot pouet-pouet… »
Rene MAGINELLE a li el carnéval ed Somain. Ch’est l’momint awai ! In va bétot fiêter l’carnéval ed Dunkerque ç’diminche-chi pi après les tros joieusses !
Jean-Marie BRAILLON i-étot pas là mais i-a invoié ches 10 mots in récrivant in texte el pus court possipe. Bravo à ti !
Michel Duwelz a perzinté « Les ratons du mardi-gras » de G.HOURIEZ, qu’i resse à VERTAIN.
A noter, dins l’partie des spectaques de l’troupe des Tartes au Chuque (qu’in truève su l’site)
-24 et 25 févérier : spectaques MARRE D’ECH MARPHONE ! à Lys-Lez-Lannoy
- 24 févérier : après-midi conférence/lecture sur le Picard au château de Ruesnes avec Nicolas MINAIR, qui parlera du ROUCHI, Laetitia DELVAL qui présentera la langue Picarde.
Pou finir, in a bu in, deux cops pi mingé… des ratons !
A bétot mes gins !
Cherque du Molin : 2 avri 2024
Mardi, in jor après Pâques et ches uéfs, in s’ artreuvé insan.ne. Mi, j’étos dallé in vagances dins l’Jura in March, aussi, j’ai rin récrit !
Joelle JONAS, no perzidinte, alle nous cor fait canter su l’air ed « Santiano ». A m’mote qué l’batiau va définir pa s’in daller vraimint !
Pou les 10 mots, ch’étot in florilèche ed testes !
Vos povez les lire dins l’rubrique « Dis-moi 10 mots in Picard ! »
cotron / broques / aufier / abrandoule / minteux / ouvrer / ramonchelache / wassingue / miyard / louchet
Complimints à Francine, Jean-Marie, Martine et pis mi…
Mi, Nicolas MINAIR j’ai li in poin.me su Jules Mousseron qu’j’ai récrit pou l’concours ed littérature picarte. Jules Mousseron tout simplémint.
Pus les 10 mots avec ène contrainte : cmincher pa « Demain dès l’aube, à l’heure où blanchit la campagne… ed Victor HUGO
Mathieu i-est vnu avec sin père. I nous a conté ène nouvielle farce aveus in prijonnier. Que vox ch’garchon-lal ! Es père, Pierre-Bernard, a fait ène plasmachon ( traduction ) d’ène canchon ed Renaud : Ej sus tous mes copains.
René MAGINELLE a li in teste d’un Tiot Père Eugène DUTOUQUET des « Mémoires de Somain » qu’i pale du pavé ed Vicoigne.
In de ches comarates, Casimir HELLE, nouviau dins l’cherque, s’a perzinté pis a li ches poin.mes su l’massacre ed Gaza, le gnaf ( in moinss eq rin ) o bin El clup des blanqués tiêtes
Ch’est d’el bielle ouvrache. I-a min.me eu in prix aux Rosati d’Arras in coeup !
Francis DUFLOT a partaché La rose et le réséda d’Aragon.
Jean-Philippe a li in poin.me d’ène finalisse d’in concours ed poésie du clup Richelieu ed Valinciennes. L’file a récrit su l’nature : « Vive la vie ! »
Hervé LOTT, nos a li in teste Montois : El chômeur policier, André LEBLANC
A noter, dins l’partie des spectaques de l’troupe des Tartes au Chuque (qu’in truève su l’site)
in s’a baladé avec Joelle pou lire ches poin.mes su les fleurs, l’z’apes à Sebourg edvant 20 personnes. L’solel i milot, tertous i-étot bin contint.
Pou finir, in vos fait ouvrer pou l’prochain cherque : traduire in Picard ène canchon ed
Le printemps est arrivé !
Ene pinsée pou ALAIN MARCHAL qui a quéu favelotte. In prindra d’ches nouvielles bétot !
In a fini : in a bu pusieurs cops pi mingé in morciau ed watiau.
A s’arvir mes gins !
Cherque du Molin : 7 mai 2024
Mardi, ch’étot no rindez-vous du Cherque. Beaucoeup d’zamisses is sont evnus paler, canter o bin juer aveuc ch’ Picard.
Joelle JONAS, no perzidinte, alle nous a fait canter sur l’air ed « L’eau vive ». Vife el ROUCHI aussi !
Alle a li aussi un « Hommache à ch’promo LIL 70" ed Bernard DEMAY.
Pus diffichile, alle nos a donné ène canchon « Le Printemps est arrivé » qu’i-a fallu traduire.
Jean-Marie BRAILLON et pis Maurice CATTIAUX is ont bin fait leu n’ ouvrache !
Ravisez après ène plasmachon ( traduction ) ed Maurice ! Ch’est fin bin ! 10/10 !
Pi in haiku ed Jean-Marie !
Pou les 10 mots, in n’d’a cor eu ène paire.
Vos povez l’zes lire dins l’rubrique « Dis-moi 10 mots in Picard ! »
cotron / broques / aufier / abrandoule / minteux / ouvrer / ramonchelache / wassingue / miyard / louchet
Complimints à Alain MARCHAL qu’i-étot rabistoqué, Gaston et Corinne.
Corinne alle a imné des haikus ( poin.mes ed 3 vers ) ed ches élièfes d’el collèche dusse qu’alle ouèfe. Vos pouvez vir l’poin.me récrit pis des dessins. Ch’est fort biau. In pus ed cha, quèques poin.mes is sont d’mi !
Mathieu i-est vnu avec sin père. I nous a conté ène nouvielle farce aveus in Américain à Parisse !
Es père, Pierre-Bernard, a li in texte ed s’n’invintion comme toudis. Ch’est rudmint bin busié !
Michel DUWELZ a persinté in écrit ed Paul MAHIEU rassan.né dins « Les Dits du Cat-Huant »
Francine a li ène canchon ed Gabriel LERMUSIAUX : in peut trover 2 testes ed l’auteur dins « Le livre du Rouchi, parler Picard de Valenciennes » pa Jean DAUBY.
Mi, Nicolas MINAIR j’ai li des fapes récrites par in ecriveu ed Gravelines, Georges DUPAS, d’in life qu’i-est aussi in glochaire ed mots ed la-vau…
Adon j’ai li « L’cat, l’moutoile et l’lapin ». Quo qu’ch’est ène moutoile ? Ch’est ène belette.
Pi aussi « L’quêne et l’rosieuw » rapport à ch’t’indrot dusqu’in dit « ieuw » pou « iau ».
A noter, dins l’partie des spectaques de l’troupe des Tartes au Chuque (qu’in truèfe su l’site)
in a fait des sketchs et pis in quizz à Escautpont el 3 mai.
El 25 mai vos êtes binvnus pou d’aller nous suire dins ène balate poétique à Auno dès 15h30 pou acouter des poin.mes ed Joelle JONAS, et mi et seurtoute ed Gisèle RAVERDY et Jean DAUBY qu’i ont vi dins ç’te ville. In vous attind edvant l’églisse Saint-Martin !
In a défini l’ouvrache pis in a bu pusieurs coeups pi mingé in morciau ed watiau.
A l’arvoyure mes gins !
Nicolas MINAIR
Cherque du Molin : 4 juin 2024
Mardi, ch’étot no rindez-vous du Cherque. Nos amisses is sont evnus paler, canter o bin juer aveuc ches mots in Picard. Pou ène fos, j’ai té el perzidint « pa intérim » rapport à l’fait qué Joëlle JONAS alle n’étot pas aveuc nous-autes.
Adon, in a cminché pa canter « L’cherque du Molin ».
In a eu l’plaisi d’arvoir Georges RAVERDY, d’Auno, qu’i-est vnu lir ein teste de s’finme, Gisèle : El wiseux. Alla é récrit in Rouchi pi fait in life : Des gins d’Auno et d’ailleurs ».
Jean-Marie BRAILLON, Francine et pis Alain MARCHAL is ont bin cor fait leu n’ ouvrache des 10 mots !
In y pale ed marcotte ( belette ), d’hourlon ( hanneton )… D’allez lire !
Pou les 10 mots, in n’d’a cor eu ène paire.
Vos povez l’zes lire dins l’rubrique « Dis-moi 10 mots in Picard ! »
Gaston i-a lu « El coquetterie » de Renée-Pierre LAMBERT de sn’ouvrache « Ti et Mi »
Hervé LOTTIN i-a li « Em grand pée », in patois Borain. Merci à l’z’amisses Belches ed vnir toudis nous acouter !
Mathieu i-est vnu avec sin père. I nous a conté ène nouvielle farce aveuc in Américain in Suisse !
Es père, Pierre-Bernard, a li in texte ène plasmachon d’ène canchon « Gare au gorille ». In a bin pris du plaisi !
Michel DUWELZ a persinté in écrit ed Georges FIDIT : « L’ « maguette »
Mi, Nicolas MINAIR j’ai perzinté des poinmes ed Marie-Ange HACHE DELVALLEZ, qu’alle resse à Noyelles-sous-Lens. Alle écrit in Français et in Picard d’Artos. Alle a eu pus ed 20 prix à des concours ed poésie avec les Rosati d’Arras ! Complimints !
S’n’ouvrache : « Ecoute…Acoute… » i-est vraimint bin : i pale de s’vie, du patois, de l’lanque qu’alle doit continuer à perdurer.
J’ai aussi li in texte ed Guy DUBOIS, dins s’n’ouvrache « Les dits qu’i dit Guy ».
Ch’est des quolibets invoïés pa les supporters ed LENS à leu footballeu. Infin, ch’est invinté…
Cha vaut l’détour !
Pou l’partie des spectaques, el 25 mai in a fait ène balate poétique à Auno dès 15h30 pou acouter des poin.mes ed Joelle JONAS, mi et seurtoute les cheux ed Gisèle RAVERDY et Jean DAUBY qu’i ont vi dins ç’te ville. In étot in nompe et pis in s’a recueli edvant l’tompe ed Jean DAUBY pou in hommache !
In a défini l’ouvrache pis in a bu pusieurs coeups pi mingé in morciau ed watiau.
Achteure, l’cherque i va passer des bonnes vagances d’été et pis in va s’arquinquer.
A s’arvir à l’rintrée mes gins !
Nicolas MINAIR
Cherque du Molin du 3 septempe 2024
Cha i-est ! Ch’est l’rintrée ! L’z’écoyers ed Auno is vont rintrer à l’bibliothèque François RABELAIS pou lire, récrire, acouter des testes in ptos d’ichi, in Rouchi, au Cherque du Molin ! Et pis bétot ène tioté elchon ed Picard in pus ! In va m’faire busier sins m’donner des doupes ( clin d’uel à l’canchon de l’cherque, not hymne ! )
Pindant les vagances, in a fiété leschint and ed Cri-Cri, no piliyé du cherque ! Bravo à li !
Adon, in a cminché pa canter su l’air « Vifes les rosses » de Guy BEART, ène canchon de Joelle JONAS, no perzidinte. Pi alle a min.me plasmaché ène tirate ed Molière in Rouchi : les fin.mes qui savtent !
Les femmes savantes pou les Moldus in Picard.
Alain MARCHAL i-a li s’teste ed binvnue et pis cor in teste su l’ju des dix mots !
In y pale ed marcotte ( belette ), d’hourlon ( hanneton )… D’allez lire !
Gaston i-a li « Eul preumier pas » d’in tiot infant !
Hervé LOTTIN i-a récrit in patos d’es coin ( Cuesmes ), in patois Borain,
« Souv’nir d’em prumière procession du Car d’Or à Mons » 12 ed juin 2024, pou ches chinquante ans ed procession !
Mathieu i-est evnu avec sin père. I nous a conté ène nouvielle farce aveuc in Belche qu’i-avot rudmint so !
Es père, Pierre-Bernard, a li in texte ène plasmachon d’ène canchon « La faute au cat », d’après « Un chat qui miaule » de Monthéus. In a bin pris du plaiji !
Jean-Marie BRAILLON nos a amujé aveuc « Ech limichon dvnu Minisse »
In minisse in Picard ed Thiérache cha veut dire ministre et … âne ! Jé n’fais mie d’rapport et vos-autes, vos avez-ti du comperdo ? ?
Michel DUWELZ a persinté in écrit ed Georges FIDIT : L’z’inguilbaudeusses » des fin.mes qu’alles ont quer à inguilbauder ches hommes. In découèfe des mots conme « brondler », « tirelariquer », « crustieux »…
Dictionnaire ed Jean DAUBY
inguilbaudeusse : jeune fille séduisante
Maurice CATTIAUX a li « ch’rassacache ». Cha a donné invie d’in faire !
Mi, Nicolas MINAIR j’ai perzinté ène arvue ed 1898 ! Ch’est « l’bribeux » qu’i-étot vindue à Monbeuche.
Dins ç’liméro in pale ed mythologie, des potins et pis i-a des cacoules à n’in pus définir !
Aussi in nouviau life, lessique ed Picard ed Gommegnies ed Patrice VASSEUR : Le Picard hennuyer de Gommegnies. Des mots, de l’phonétique, de l’morphologie… In rute ouvrache ed qualité !
In truèfe eddins des mots espécials du parler de ç’villache !
Pou l’partie des spectaques, el 21 septempe, ch’est m’mariache ! Ouais ! L’mariache à chabots ! A Auno !
Vos êtes tertous invités à l’cortèche, à l’chérémonie, à l’vin d’honneur pour boire pusieurs cops…
Après, i-a in erpas et in bal dusse qu’in va guincher.
Jean-Philippe VEZIN nos a li « el mariache à chabots » grand-mère ed Jules MOUSSERON
El 26 septempe, in va arfaire ène soirée à l’Estaminet Le Pot Flamand à Thiant ! In va minger et rigoler aveuc des esketch, des lectures et d’z’edvinettes !
In a défini l’ouvrache pis in a bu pusieurs coeups ( ed cite ! ) pi mingé in morciau ed watiau.
A s’arvir el preum octope mes gins !
Nicolas MINAIR
Cherque du Molin du 1 octope 2024
Mes amisses ! Nos vlà-chi à l’bibliothèque François RABELAIS pou lire, récrire, acouter des testes in Rouchi, juer avec des mots, au Cherque du Molin !
Adon, in a cminché pa canter su l’air « Vifes les rosses » de Guy BEART, ène canchon de Joëlle JONAS, no perzidinte. Pis alle nos a appris qu’ Guy DUBOIS i-étot défuncté, li qu’i-a tint défindu l’Picard et minme fait l’écolache dins ène école ed patois ! I-a écrit des dizain.nes ed lifes, i-a compilé d’z’écrits de ches auteurs des Hauts-de-France… In s’ramintuv’ra ed ti pindint longtemps Guy !
In a accuelli Françoise et Gérard LEDUCQ pour leu preum fos au cherque. Binv’nue à euss !
Gérard LEDUCQ i-a fait in glochaire ed sin parler picard du Cambrésis : Le parler picard Cambraisien de Saint-Hilaire-Lez-Cambrai. In i apprinds beaucoup d’cosses avec les mots. Dallez l’lire !
I-est edité pa l’Société d’Emulation de Cambrai.
Alain MARCHAL i-a li s’teste ed binvnue, in molé pus long. Cha cange ! Cafougnette à l’mariache à chabots dusse qu’i perd ches rhabillures. Queu d’allache !
Gaston i-a li in teste ed Renée-Pierre LAMBERT, d’sin recuel « Ti et Mi » qui pale d’in infant qu’alle a pas éu.
Hervé LOTTIN i-a récrit in patos d’es coin ( Cuesmes ), in patois Borain, « A Marseille »
I nos invite tertous el 3 novempe à 15h, pou ène choirée du Cabaret Montois pa les Montois Cayaux.
Salle Calva, 641 avenue du Roi Albert, Jemappes.
Mathieu i-est evnu avec sin père. I nous a conté ène nouvielle farche avec des kangourous qu’is-avottent rudmint so mais l’prix d’el verre i-étot bin quer !
Es père, Pierre-Bernard, a li in teste ène plasmachon d’ène canchon «La ballade des gens heureux » ed Gérard LENORMAND. Ch’est dévnu « El canchon des pas contints ».
« Is bertonn’tent, is méronn’tent, is roumionn’tent », 3 verpes pou dire qu’ils râlent !
Jean-Marie BRAILLON nos a li d’z’haikus récrits pa des colléchiens in 3ème, rapport à chu qu’is appren’tent avec Corinne THOURET, maristresse ed Picard à l’collèche du Nouvion, in Thiérache. Bravo à eusses !
René MAGINELLE i-a rindu hommache à Guy aussi in lijant « Rintre ichi frère » du life Les dits qu’i dit Guy.
Mi, Nicolas MINAIR j’ai palé d’em mariache ! Mariache à chabots ! J’m’ai marié avec Hortense el 21 septempe 2024, à l’mairie d’Auno. D’allez vir su l’pache d’z’actualités les photos prisses, ch’est fin biau.
Des chabots ? Oui, rapport à l’tradichon ed mette à ches pieds des chabots pou in mariache « sins prétinchon ».
I-a éu d’artiques su l’Voix du Nord et pis l’Observateur du Valenciennois !
Pou l’partie des espectaques, el 13 octope, les Tartes au chuque, alles juent à les Nymphéas à Auno !
In a défini l’choirée pa ène canchon Les Coulonneux cantée pa Nathan, pis in a bu pusieurs coeups pi mingé in morciau ed watiau.
A s’arvir el tros novempe mes gins !
Nicolas MINAIR
Cherque du Molin du 5 novempe 2024
Rinte ichi frère !
Ch’est chi qu’i disot l’amisse Guy DUBOIS dins in ed ches poin.mes.
Rintrez mes gins. Habile ! L’cherque i va cmincher.
Ch’est grand jor ! In va voter à main elvée pou l’perzidint du
ROUCHI ( Rassemblements, Organisation et Union des Cabarets des Hauts-de-France)
Adon i-ara el brissaudeusse Rwétala HELQUIQUISSE, ène diseusse ed bonne avinture à Cropa-à-Celchy
et pis mis Daniel TRIMPE, mayeur ed Mézy-su-Esguif.
No programme vos povez l’zes lire ichi après.
Daniel trimpe (15.69 Ko)
Mais ch’est quand minme mi qu’i a té éli perzidint ! 7 votes à 4 ! Ch’étot pas treup arserré.
J’sus trisse pou ti Rwétala, mais t’boule ed cristal alle est infunquée !
Bin, pisqué no vraie perzidinte alle n’étot pas avec nous-autes, Jean-Philippe l’ rimplachée pou faire el voïante.
Martine, no assistante, alle a li les « scoops », ed daraine minute. In congrès ed diseus à Paris s’a réuni pou edviser d’leu avenir... !
Bon, pus sériuzmint, in a découverre de nouviaus testes avec :
Gaston et l’life ed René-Pierre LAMBERT « Ti et Mi », ch’est djà récrit dins in aute résumé. D’allez vir esn’ouvrache.
Hervé LOTTIN nos a arlu l’fape de Pierrette ed La Fontaine dins l’patos Borain. Avec des cangemints pou faire rire bin seur.
Alain MARCHAL nos a récrit sur l’solel et pis l’leune. Du solel i nos in faut bin pacé qué dins ch’n’aprézeut* (automne) in a in ciel gris comme… comme… à vous d’em dire. I-a des neuées à n’in pus finir.
Francine a perzinté ène BD ed Cafougnette.
Cha cange des poin.mes. Ichi i-y-a des bulles partout ( mie des bulles ed crémant atincion !)
Michel DUWELZ i-a li Georges FIDIT : L’pagnan et l’pain de cuitie, tout i-est espliqué su l’photo.
Pagnon, riboche, talibure… Cha sint bon tout cha.
Mi j’ai li des testes in Picard Montois, rapport à des arvues « El Gazette des Camerluches » de l’achuchon des Montois Cayaux.
Un Montois Cayau est un Montois demeurant depuis longtemps à Mons.
Ej sus un Marlysien Cayau adon ? Et vous-autes ? Un cul d’oson cayau ( HERGNIES) ? Un leu d’Auno cayau ?
Un rasineux d’gamelle cayau ( Vieux-Condé ) ? O in bourgeos ed Valinciennes cayau ?
Dallez vir el diccionnaire du ROUCHI ed Jean DAUBY pou les noms j’tés, les sobriquets.
Rappel : Rouchi cha vient ed « drochi » tout drot ichi. Ici, dans cette direction.
J’ai espliqué aussi m’conférinche, em colloque des lanques régionales dins les Flandres, a mon les flaûtes ( prononchez fla/u/te jé n’sais mis mette le tréma !). Ej sus minme d’allé à l’consel régional à Lille.
Pis j’ai rincontré des Allemands qu’i z’ont découverre le patois avec « Bienvenue chez les Chtis ».
Is sont evnus à Perziau, tarte à pronnes et à greus noyaus… pour edviser avec mi ed Picard, Rouchi, Chti… et définir avec ène soirée chti in mingeant de l’flamique, d’el fricadelle, des ratons à l’castonate…( ch’est cor bin long ) in acoutant Mauricette CHEVAL qu’alle a dit in sketch in Rouchi, traduit in Allemand !
Ramintuve-te : « Si t’es d’ichi, té dos parler Rouchi ! » Roger BAR
Cherque du Molin du 10 déchempe 2024
Nous arvlà ichi au darin cherque du Molin !
In comminchera par inde hommache à Pierre-Bernard DABLEMENT, in poète fin récriveus ed no Rouchi. Imache prisse d'in Urchon Pico, el arvue ed Jean-Marie BRAILLON
I-a récrit des poin.mes, des sonnets, traduit l’Avare ed Molière in alexindrins, i-a invinté des personnaches comme Varis o bin Mouc’al nasse.
I-a récrit des dreules ed testes qu’i nous faisottent bin rire.
In peut l’zes trouver dins les incien.nes brochures du cherque !
Mais ej vas mette dins l’onglet « écriveus d'achteure » in d’ches poin.me qui s’lomme « Mes m’tiots vers ».
Lisez bin : quind ç’te poète i disot qu’i n’sra jamais Hugo o Lamartine, qu’i n’fro jamais salon, à l’débout i-a compris ç’te vérité : « Min salon j’l’a eu, ch’est l’Cherque du Molin » !
Joelle JONAS a li « Noé » toudis de ç’t’homme, qu’i vnot avec es garchon.
Té vas no manquer ! Adé Pierre-Bernard !
Après cha, in aro volu avoir in molé ed bénajté avec Hervé LOTT rhabillé in Sint-Nicolas mais i-a attrapé arnioque ! attrapé arnioque = être grippé ichi
In a canté « Santiano », et Nathan SADLER, no canteu des tartes au Chuque, i-a composé ène nouvielle canchon « Ch’est in chti Noël, avec Alain MARCHAL et Joelle. Ch’est in chti Noël, in espérant que l’nouvielle année alle s’ra bielle. »
Complimints !
D’autes amisses ont li leu testes : Alain MARCHAL et s’CAFOUGNETTE ( vir photo ), Michel DUWEZ et « L’Noël chucré » in Picard ed Roubaix, Gaston et in poin.me ed Renée-Pierre LAMBERT, comme à s’habitute, Gérard LEDUCQ, d’el Société d’Emulation de Cambrai, avec in récrit ed Géry HERBERT : « Ch’horoscope à tiot MARTIN », Georgette LALOUX, amisse ed Mons, a li in poin.me ed Marcel GHILLIS, écriveuse Montois, et canté « In est boreigne o in n’l’es nié » rapport à l’indrot dusse qu’alle resse, Cuesmes.
Camscanner 12 12 2024 09 20 (1.49 Mo)
Maggie, ène nouvielle qu’i-est né à Maing, comme mes taions, alle a déclamé in poin.me ed Jean DAUBY « L’momint des fiêtes ». Que biau momint !
Joelle a parlé d’ches espectaques, d’allez vir su l’pache ! Et pou finir l’année in belté, jvas vous perzinter deux prisses eq j’ai archu des ROSATI d’Arras, 2ème prix François FROMENT.
Vla chi el logo d'el Société fondée el 12 juin 1778.
J'ai eu el’preum prix d’el langue Picarde d’el Société d’Emulation de Cambrai, parrainée pa la Société des Poètes Français. Marc NIEUWJAER, administrateu de la Société des Poètes Français, poète émérite ( Rosati aussi ! ) i nous a fait l’plaisi ed vnir avec es’ musse. Alle avot fait d’el tarte au libouli. Que guinse !
Vla chi el logo de la Société des Poètes Français, achuchon créée in 1902, rapport à l'naissinche ed Victor HUGO chint ans avant. Alle a été fondée pa Léon DIERX, Sully PRUDHOMME et José-Maria de HEREDIA avec es' perzidint Auguste DORCHAIN ed Kimbré !
Et me vla in train ed lire el poin.me "Jules Mousseron" qu'vos povez lire ichi.
Jules mousseron 1 (16.17 Ko)
I-y-a min.me ène vidéo e dmi sur facebook avec ène barette et ène lampe ed mineur !
Adès, in a mingé des tartes et bu du vin ed Valinciennes, du jus d’pun ed Marly et pis d’el bière.
Bonnes fiêtes tertous et pis à l’année prochaine si tout va bin !
N’obliez mie el messe in Rouchi el 15 déchempe à 10h30 à l’eglisse de La Briquette ed Marly !
Cherque du Molin du 6 jinvier 2025
Ene bonne et héreusse
Ene longue et joïeusse
Des doupes dins s'saclet
L'ress à dépinser !
D'l'ouvrach' pou in an
Pas l'momint d'faire nanan
El’ Rouchi i faut l'définte
In s'ra toudis in bonne binte !
Ene nouvielle année qu’alle cminche à l’cherque du Molin !
Mais l’vint i-a torné pou l’amisse Roger BAR qu’i avot fiêté ches 102 ans.
I-a arjoint André PEULMEULE, Gisèle RAVERDY, Pierre-Bernard DABLEMENT, Alfred LECOCQ, Michel DAMEZ… des piyiers du cherque, o putot des raions de l’roe du Molin Souverain.
In a quind min.me no fidèles Joëlle JONAS, perzidinte, ( qu’i li souhaite el sinté ! ), qu’i nos a fait canté
« Au cherque du Molin » pou nou ramintuver de CriCRi qu’alle resse à mon Saint-Amand.
Joëlle, alle a écrit in hommache à no maite in Rouchi. Té vas-ti l’mette sur l’site ?
Mi, Nicolas MINAIR, j’ai li « Un poète s’en est allé » et « Dins min pays » ode au Rouchi qu’i l’avot déclamé in 2004 ! C’te poin.me i va ête in preum pache, d’allez l’lire !
Adon, vlà ène flopée ed’z’auteurs qu’is ont li o bin récrits quetcosse in Picard :
- Gaston, et in poin.me ed Roger, ed l’arvue l’arnitoile, qu’vos povez lire, i n’d’a cor des eximplaires.
Et avec cha ? ( Ch’est l’tite du poin.me mes gins, faut suire ! )
- Alain MARCHAL i-a li s’mot d’intrée, infin ches 2 mots, des vœux ed bonne année, bonne sinté, ouèfe et’saclet et pis… Non, ch’est des vœux des biêtes d’el zoo ! In éléfant qu’i dinse avec in boque. Manmère ! Atincion à ses pattes !
Et avec cha ?
- René MAGINELLE a li in teste ed Paul VIDON d’z’amisses du Viu SOMAIN.
I nos a ramintuvé el conjugaison Rouchi du vierpe AVOIR
J’ai / J’arai / J’arai eu / J’avos / J’aros / J’aros / J’aros eu / Qué j’euche / Qué j’euche eu … qué temps mes gins ?
Sins raviser dins l’dico ed Jean DAUBY, sins téléfoner à l’amisse Jean-Marie BRAILLON, l’inchyclopédie vivinte, sins dmander l’aite du public ni le 50/50, ni d’canger ed question, invoiez vos réponches pa e-messache ( cheulle de l’achuchon, faut trouver su l’site !) Chti qu’i-a bon in preum, in l’dira à l’prochain cherque. Mais i-a mie d’doupes à gagner !
Et avec cha ?
- Martine a li des poin.mes ed Roger, bin ouais ch’est no patron !
Et avec cha ?
- Francine nos a arlusé avec des expressions in patois du Cambrésis, d’el revue Jadis en Cambrésis.
« Ch’est dur comme du quien ! » rapport à l’temps dusse qu’in mingeot du quien pindint l’guerre ed 1870.
Et avec cha ?
- Gérard LEDUCQ nos a conté l’histoire d’in pou qu’i voulot canger d’mason. Pou définir, ç’pou i-a arquéu su l’tiête d’in caufe !
Et avec cha ?
- Jean-Philippe VESIN a li ène histoire de Varis et Mouc’alnasse écrite pa Pierre-Bernard.
Et avec cha ?
Mi j’in ai proufité pou lire « ène histoire ed cats » dins l’but ed moutrer l’érudicion de çt’homme-lal.
Aprés, in a bu in cop et pis mingé d'el galette. Bravo à ti, Marie-Paule LELONG d'ête el nouvielle rein.ne ( pas des neinches ! )
Pour l’prochain cop, cha s’ra l’assan.née générale. N’obliez pas de vnir et si vos volez bin, armette vos mains à vos poches pou cotiser à l’association patoisante Georges FIDIT.
Et avec cha ?
« Si t’es d’ichi té dos parler ROUCHI ! »
Roger BAR
RAPPORT D’ACTIVITES DE L’ASSOCIATION PATOISANTE GEORGES FIDIT 2024
-Rappel du passé de l’asso (34 ans)
Le journal « L’Arnitoile », la troupe de théâtre de l’Arnitoile (de Roger BAR), la messe en rouchi longtemps organisée par Liliane Peulmeule, reprise par l’Association Access de Marly, laquelle a organisé la messe du dimanche 15 Décembre2024, le Cercle du Moulin (pensées pour les Présidents d’honneur Roger Bar et André Peulmeule, ceux-ci nous ayant quitté et tout récemment pour Roger Bar, dans sa 103ème année)
-Le bureau
Pas de changement pour cette année : Joëlle JONAS, Présidente ; Nicolas MINAIR, Vice-Président ; Any BROWERS, Trésorière ; Françoise MARCHAND Secrétaire.
-Description des activités actuelles
Site internet picardrouchi.com ; Troupe de théâtre « Les Tartes au chuque » ; La réunion mensuelle du Cercle du Moulin. Ce dernier est toujours très actif et compte chaque mois entre 20 et 30 participants dont certains viennent du Douaisis, de Thiérache, du Cambraisis et de Belgique. Remerciements à la ville d’Aulnoy qui met sa médiathèque à la disposition d’ l’association pour tenir ces réunions.
-Les activités 2024:
.Deux animations à l’estaminet « Le pot flamand » de Thiant.
.Atelier initiation au rouchi+spectacle à Escautpont.
.Participation au Festival du Parlache Picard 2024, à Lys-les-Lannoy.
.Participation à l’évènement « Mémoires d’Aulnoy » : Le mariage à chabots, ballade patoisante sur les traces des auteurs aulnésiens ( Jean DAUBY, Gisèle RAVERDY ), animation théâtrale aux Nymphéas.
. Atelier intergénérationnel à Onnaing, dans le cadre de la Semaine Bleue.
. Spectacles à Aubry-du-Hainaut, à Wavrechain-sous-Denain (téléthon), à la Médiathèque de Bouchain
. Participation au colloque sur Jules Mousseron (4 Décembre), sous forme d’initiation à la lecture de poèmes par des étudiants de l’Université Polytechnique des Hauts de France.
. Participation à la messe en rouchi du 15 Décembre 2024, à Marly
-A déplorer, les décès de André Peulmeule, Guy DUBOIS, Gisèle puis récemment Georges RAVERDY, Pierre-Bernard DABLEMENT, Roger BAR, Roberte DUCHATELET
- 2025 :
.En Février : Spectacle des « Tartes au chuque » à Lieu-Saint-Amand, dans le cadre du week-end Culture.
.En Mars : Animation de l’après-midi « crêpes » pour les aînés de Baisieux (organisé par le CCAS)
- Balade poético-botanique en Rouchi et Français dans le cadre du Printemps des Poètes
.En Avril : Animation repas patoisant à Mastaing (à confirmer)
.Tout le long de l’année, pour une restitution en Mai Aux Nymphéas : Montage d’un spectacle chantant en rouchi avec l’école Zola d’Aulnoy-lez-Valenciennes, avec 4 classes du cycle 2. Restitution en Mai.
- Le rayonnement de l’association et du Rouchi
- Un colloque sur les langues régionales a été organisé par la FLAREP au château d’Esquelbecq en Novembre2024.
- Nous avons promu l’asso à la Radio CNO de Valenciennes, la Radio Club de Wallers et à la radio RCM de Condé-sur-l’Escaut.
- L’association a créé des liens avec la Société d’Emulation de Cambrai.
- L’association a rencontré des membres d’une communauté allemande, des Sorabes, qui ont découvert la langue.
Le rapport moral a été voté à l’unanimité.
Merci gramint mes gins !
Cherque du Molin du mos d'March 2025
March et cha r'part !
Ch'étot ène espécial "Dis-moi dix mots" in Français pi in Picard.
Dallez vir su l'pache " Dis moi dix mots" pou lire tous ches biaux texes.
Ichi, in estrait d'el canchon " Au cherque du Moulin, de CRI CRI Glinkowski
Cherque du Molin du 1 avri 2025
Bé nan nan , ch’est mie in pisson d’avri !
In étot ène quinzainne ed gins pou canter su l’air ed L’iau vife ed Guy BEART, acoutez Joëlle JONAS lire es’fabe El sauret et l’saumon, et d’autes cacoules racontés pa nos amisses !
Adon, in a cminché pa armercier tous l’z’amateu ed Rouchi qu’is sont vnus à Sebourg pou l’balate alintour du villache. Trinte gins, et minmes des dames d’el mason rurale Pierre CACHEUX !
Que biau momint dusse qué Marie-Grauette pis mi-minme, Nicolas MINAIR in a li des poin.mes su les plantes comme el lavinte, el sale ( la sauge ) o bin el poulivet ( thym serpolet !)
Alain MARCHAL i nous a li comme d’habitute es’composition.
Jean-Marie BRAILLON nous a conté Chindrouillon qu’alle sint vraimint mé ( mauvais). Alle n’s’a mielavé edpus des chintaines d’années ! Dallez vir es n’arvue Urchon Pico liméro 488 su Calaméo.
Michel DUWEZ a li in estraordainaire poin.me ed Paul MAHIEU, picardisant ed Tournai, I d’a, rapport à tous ches mots qu’in a découverre pa exempe : . I nd’a des mots à apprinte pou l’prochain coeup…
Gérard LEDUC i nous a raconté ches ramintevrances, sin passé. Merci à li !
Mi, j’ai treuvé dins ène arvue des « Amis du Caillou-Qui-Bique », des texes in picard belche, comme El ducasse de Bry qué j’vas mette ichi.
Pi j’ai li in poin.me d’André DUFOUR, chti qu’i-a crée les Tiots Pères à Douai. Si té d’ichi, té pales comme ichi. Cha vous ramintuve pas quéqu’in du cherque ?
Francine alle avot pris s’n’ Arménaque des gins du Nord avec in texe ed Jules MOUSSERON : Les baraques
René Maginelle des Tiots Pères a canté Les vagances in Ostrevent pastiche d’ Un clair de lune à Maubeuge.
In a découverre qui qu’ch’étot Marie SOUPLET ed Maing, qu’i a écrit Si in n’mourot plus. Ene vielle finme ed Maing qué connaissot note amisse… Alla nous a bin fait rire avec ches expressions bin du Nord : « Si té minges du papier té va quier des rubans ! »
Gaston a i l’arnitoile, arvue qué Roger BAR avot fort quer. El marouleux, ch’est l’texe.
Ajouter un commentaire